Robin's Palm Writings: nicte cadzu 2 pi 2 pi'e 1 mo'o

Robin's Palm Writings Category: la nicte cadzu

Navigation: la nicte cadzu Index Robin's Palm Writings Top-Level Index


ni'o re pi re mo'o nu penmi lo kalte

ni'o loi ci prenu cu casnu lo na vajni ca'o lo nu se'ixru le sanmi kumfa .i py cusku lu mi'a ro roi cuxna pa gidva be lo cnino .i la deivid cpedu lo nu gidva do .i mi'a tugni .i ku'i dy sipna .i .e'u do bu'u denpa .i ku'i ji'a .e'a do cliva gi'e ba za xruti li'u ju'e lu ki'e do mi stali gi'e penmi lo kalte li'u ju'e lu xamgu li'u

ni'o ca lo nu co'i klama vau la .djen. za'u roi friti lo cidja sy .i sy cusku lu ki'e sai do .i lo tansi titnanba cu kukte simlu .i mi djica ri pe'u do li'u .i la djen cusku lu .ui ti mutce clite .i mi nelci .i mutce frica so'a do li'u .i ro vi remna cu cmila .i ba bo sy cusku lu doi .djen. mi kucli lo krinu be lo nu do pu za cusku zo citka .e na zo remna li'u ju'e lu pa mai so'i mi'a na krici lo du'u lo blupinxe cu remna .i re mai so'u na prenu cu bu'u xabju .i je'u pa ri klama ti li'u

ni'o lo cmalu je citno ke xekri gerku ja'a bajra fa'a dy .i sy zgana lo nu le flira be py cu na'e gleki binxo gi'e rivbi tu'a dy .i le gerku cu plipe lo birka be dy noi cmila gi'e satre gy gi'e cusku lu coi gys .iu xu do xagji .i xu do xagji .i mi smadi lo nu go'i .i .iu je'u .i .iu je'u li'u .i sy cusku lu mutce melbi .i ma se gerku la gys li'u gi'e ca bo? birka tcena fa'a gy .i py co'a kajde cusku ca lo nu gy se fanza bacru gi'e bartu vasxu lo .ue cai fagri poi sy troci co rivbi ke'a .i ku'i pa xance be sy cu milxe sai se xrani .i ji'a pa birka ke creka pagbu cu se daspo .i dy .e py .e lo drata ca te preti fi lo se du'u xu kau sy jursa xrani

ni'o ca ro pu zi fasnu la susan viska la .gys. po'o gi'e sanli do'e lo tcena birka gi'e na spuda lo drata prenu .i la .gys. xanka punji le flira lo te polje be la djen .i ba zu bo sy smaji cusku lu .u'e sai la .gys. cupra lo fagri li'u

ni'o ba bo ze'a curve lo ka smaji .i lo mutce barda je clani nanmu cu suksa ke cladu cmila gi'e cusku lu li'a cai la .gys. fagri cupra .i lo cnino cmima cu mutce certu lo nu zgana .u'i sai li'u .i la djen ba zi troci lo nu na cmila kei gi'e ku'i fliba .i sy ze'i ca'o manci catlu la .gys. .i ku'i sy suksa jimpe gi'e ji'a cmila .i se ki'u bo so'i drata cu cmila .i ku'i la pal fengu cusku lu na zdile .i ju'o sai ca da le gerku cu snuti catra lo remna li'u .i ku'i la'e di'u mukti lo nu po'o lo barda nanmu cu zenba cladu cmila .i la'e di'u krinu lo nu so'a prenu ku ji'a zenba cladu cmila

ni'o ba zi bo lo nu cmila cu tolcfa .i lo barda nanmu cu pendo darxi sy gi'e cusku lu fi'i cnino do cinri gi'e zdile .i mi krici lo du'u do ba xamgu cmima binxo li'u gi'e cliva le kumfa .i sy cusku lu ma cmene ta li'u .i la djen cusku lu zo .axmed. .i li'a ri nelci do .i ku'i ca ku do selyli'e mi .i ri'a bo le do birka cu xrani li'u ju'e lu na go'i .i mi kanro li'u .i la djen milxe fengu binxo gi'e cusku lu mi .e nai do mikce ne'i ti .i do kanro ca lo nu mi jdice lo du'u do kanro .i ba'e na pu go'i li'u .i dy lacpu sy le xamgu birka .i py selyli'e gi'e cisma

ni'o lo xrani cikre kumfa cu lamji le sanmi kumfa pa'a so'a drata kumfa .i le kumfa cu jinsa gi'e blabi .i dy minde sy lo nu zutse lo jubme to sy ro roi kucli lo mukti be lo nu lo mikce na sabji lo stizu toi kei gi'e catlu le birka gi'e xusra lo du'u lo fagri xrani cu na jursa gi'e ku'i nitcu lo ve mikce .i dy ze'a facki lo rigni se sumne pesxu gi'e punji ri le birka .i .ue le pesxu cu sutra sidju .i preti lo se marji sy dy .i dy cusku lu lo cortu jdika xukmi .e lo punli jdika xukmi .e lo makfa litki poi zenba lo nilsutra be lo nu cikre .i la .stefen. cu di'i zbasu ri .i zo'o ru'e ca'e do kanro li'u gi'e xendo cisma


Created by rlpowell. Last Modification: Tuesday 16 of January, 2007 21:42:28 GMT by rlpowell.