to'i ni'o ni'o dei lidne le xe fanva be fu mi no'u la komfo,amonan bei fo lo glico bei fe la'e zoi zoi The disappearance of Crispina Umberleigh zoi noi ke'a cmalu cfika gi'e se finti la'o zoi Saki zoi .i la'e di'e pinka le se go'i mi

.i tu'e pa mai pa le cfika prenu cu se jibri lo nu me la'e zoi zoi wine-brother zoi .i mi na'e djuno lo du'u ma kau smuni zoi zoi wine-brother zoi .i se ki'u bo mi fanva ri fu zo vancanja

.i re mai ro le su'e re moi be le'i krasi jufra cu mutce lo ka ce'u pluja .i se ki'u bo se jmina mi fi'o lamji le fanmo be le xe fanva

.i ci mai le go'i cu lidne le liste be le cmevla jo'u fu'ivla jo'u cnino bo lujvo poi ke'a pagbu le xe fanva tu'u

.i e'o sai ko te pinka toi

ni'o ni'o

nuncanci la krispinas ambylis

ni'o ne'i pa lu'a le selre'e po le pa va'e zi'e poi ke'a sutra xe klama la balkan fo le pinta je crino gugdrmadiara bo pintu'a ku'o lei re ritpre cu zutse va'o lo nu ru'i nai pedysmi casnu .i le go'i cu pa re'u jmaji ca le lenku je grusi cermurse bu'u le jecta korbi poi bu'u ke'a lo catni cipnrxakuila pe'a cu te jmina lo za'u moi stedu zi'e poi bu'u ke'a le dotco tutra fe'e mo'u fa'u fe'e co'a se turni lai xoenytsolrn fa'u lai xapspurk zi'e poi bu'u ke'a lo catlu ke catni cpimo'u pe'a cu bilga lo nu clite je kujmli ju'o cu'i je ku'i tatpyri'a ju'o ve kakpa zi'o lo dakli po lo za'e nunsipxagji pe'a litru .i ze'a le djedi cu denpa fi le nu stali la vin kei fo le nu litru .i ba zi bo lei re litru cu ge jmaji ne'a le trene gi xendo bo simxu je rarna zutse ne'i pa lu'a le selre'e .i le citme'a cu simsa lo'e jansu lo ka ce'u se viska jo'u jikca .i je da'i nai le go'i cu vancanja co ckini loi xlura vlipa .i ju'o le citmau cu karnysku .i no le re nanmu cu ckaji lo ka ce'u na'o mutce lo ni ce'u tavla .i je bo le'i re nanmu cu simxu lo nu ckire fi lo ka ce'u na'e mutce lo ka ce'u tavla .i se mu'i bo le go'i so'o roi di'i nai simxu lo nu tavla

.i pa te tavla cu rarna binxo le vajrai .i ne'i la vin le re mei ca le prulamdei cu se jungau fi le du'u pa terdi misno pixra cu cizra canci lo bitmu po'e la luvr

.i lu ba'a ju'o lo dracysmi nuncanci be pa'a la'e de'u cu cupra pe'a lo selcrepu pe'a noi fukpi so'i mei sei le karnysku cu cusku li'u

.i lu ba'a nai la'e de'u zo'u le nuncanci cu fukpi so'i da sei le vancanja cu cusku li'u

.i lu ie li'a la luvr pu ru'i nai te zerle'a li'u

.i lu mi pensi lo'e nu zerle'a lo remna e nai lo pixra .i su'a nai mu'u la noi fetfamti mi ku'o krispinas ambylis li'u

.i lu ba'a nai mi pu tirna da pe se ra'a le bi'u nai cuntu sei le karnysku cu cusku .i je ku'i ca bo mi zvati ze'o la gligu'e .i mi no roi djuno lo du'u ma kau cu fasnu li'u

.i lu e'a do ba tirna facki lo du'u ma kau cu ca'a fasnu .i jo bo do sinma lo du'u ri sivni sei le vancanja cu cusku .i pa mai ju'a le lanzu cu na'e birti lo du'u lo nu la poi fetspe ambylis goi ko'a cu canci cu betri .i la eduyd ambylis goi fo'a zi'e noi nakfamti mi cu ba'e na'e ruble lo ka ce'u zukte .i bo da'i nai ma'i lo jecta cuntu ku bilga lo nu sinma fo'a kei mu'i lo nu fo'a tsali .i je ku'i ju'o sai fo'a se jitro la krispinas .i je'u mi no roi penmi lo prenu poi ke'a na dunja pe'a ja'e lo nu se jitro kei ri'a lo za'i ze'u kansa ko'a .i zu'u so'o prenu cu rarna jatna .i zu'u nai la krispinas ambylis cu rarna za'e flafi'i jo'u za'e flarejgau jo'u za'e flatibyfu'e jo'u za'e selskupai jo'u curmi jo'u tolcru jo'u pulji jo'u pajni su'a .i la'e di'u co'a dimna ko'a ca le mu'e jbena o nai le nu verba .i pi ro lei selzda be bu'u joi ga'u le jupku'a ke zdani pagbu cu co'a se jursa se jitro ko'a .i je bo le go'i cu simsa lo'e cakcurnu poi ke'a lifri lo bisli cedra ku'o lo ka ce'u tolfapro go'i .i lo ka ko'a tarti kei ri'i mi noi ke'a se famti zi'e poi ke'a ru'i nai vitke cu simsa lo'e vidru lo ka ce'u ca'o lo nu renvi cu tolpluka kei e lo ka ce'u claxu lo vitno jalge .i je ku'i lei panzi be ko'a cu tcemanci ko'a .i bo loi nu tadni e loi nu pendo e lo selcu'a cidja e loi zdile e loi lijda ritli e lo selmlu be lo kerfa cu se javni fi'o se mapti lo seldji jo'u pluka pe le banli ninmu .i la'e di'u sidju do lo nu jimpe lo du'u le lanzu cu se jenca lo nu ko'a nalselzga je nalselckika'e canci .i ri simsa lo nu le la poi cesyvu'e paulos banli malsi a le la pikydilis xotli cu canci da'i ca lo nicte ja'e lo nu lo po'o canlu be no da cu datni lo stuzi be le no'a .i du'o ro da no de raktu ko'a .i da'i nai so'i pu'o fasnu cu rinka da'i lo nu lo nunji'e cu steci mansa ko'a .i le citrai bersa pu se'ixru fi le ckule fi'o se bevri le nalmansa ke te jungau seltcidu .i je bo ko'a pajni da'i tu'a le go'i ca le lecydo'i be le djedi poi ko'a ca ke'a cu canci .i ga nai le bersa pu suksa canci da'i gi kakne lo nu smadi lo mukti .i ji'a ko'a e pa nurma catnrdini pu ca'o simxu lo nu te xatra ve cu'u le karni .i ve cu'u lei xatra ko'a pu ba'o jarco lo ka selni'i fa lo nu ny cy jdasre gi'e sevzi nafxu'a gi'e darlu fapro fi lo selvamcau .i no fadni cu mukti da'i lo nu ko'a sisti le bi'u nai nu darlu .i li'a tu'a le cuntu cu te lacri le pulji .i je ku'i lo nu cy ve gubjungau ve cu'u lo karni cu se fanta ji'e lo ni ce'u cumki .i je kampu se krici fa lo du'u lo nu ko'a cliva le jikca girzu cu se rinka lo nu ko'a co'a xabju da'i le tolci'o remna zdani li'u

ni'o lu ma zi jalge ri'i le lanzu sei le karnysku cu te preti li'u

.i lu ro le nixli cu terve'u lo relxilma'e .i le ninmu ke relxilma'e fenki pu ca'o ranji .i je bo la krispinas pu junri tolcru lo nu le selzda cu selcu'u le go'i .i lo ni le citrai bersa cu zifygau ri ca le bavla'i kulcitsi cu se jalge lo nu bilga lo nu ri ro moi le'i kulcitsi poi ru ca ke'a cu ve ckule fo zo'e bi'u nai .i lei citme'a bersa cu stidi lo du'u ju'o ru'e dai le mamta cu kaskla ze'o le gugde .i je bo tolylazni sisku tu'a ko'a bu'u lo o'a nai ru'e ro'a ra'u klesi be lo surselstu be la monmartr be'o poi bu'u ke'a tu'a ko'a to'e lakne mutce se facki da'i li'u

.i lu xu le nakfamti pu ze'a na kakne lo nu facki lo tolvajrai do'a nai ke danfu sidju datni li'u

.i lu da'i nai da nuzba fo fo'a .i je ku'i li'a mi ca na djuno la'e di'u .i ca pa djedi fo'a cu ve notci lo du'u le fetspe be fo'a pu se zerle'a gi'e selmipri selbevri fi le bartu be le gugde .i zo'e cusku lo se du'u ko'a se mipri bu'u pa lei daplu be vi lo xaskoi be la noreg ju'o cu'i gi'e kufra gi'e se xamgu se kurji .i je bo ji'a zo'e mi'ecpe lo jdini .i su'a nai ei se'i nai lo rupnu be li re ki'o cu dikni lo nu ri se pleji kei lo nanca .i jo nai da'i ko'a ba zi se xruti fi le lanzu li'u

.i le karnysku cu ze'i smaji .i je ba zi bo co'a smaji cmila

.i je bo cusku lu ju'o sai ranxi lo'e nu jdini bo mi'ecpe se pinfu li'u

.i lu ga nai le fetfamti cu slabu da'i do sei le vancanja cu cusku gi do kucli da'i lo du'u na mi'ecpe lo zmadu li'u

.i lu mi jimpe lo du'u le nakfamti cu se xlura .i xu zo'e snada xlura fo'a li'u

.i lu ju'a fo'a bilga lo nu pensi lo drata prenu e vo'a ji'a .i lo nu la krispinas di'a jitro da'i le lanzu cu betri da'i ba lo nu ri pu ganse lo vrusi pe'a be lo nunzi'e kukte pe'a .i ji'a su'a bilga lo nu pensi le srana be lo za'u prenu .i su'a nai fo'a ba le nuncri be fo'a cu co'a tolsanji zenba lo ka ce'u darsi je cfagau kei lo mutce ma'i lo jecta cuntu .i lo ni fo'a selnei e lo ka fo'a xlura cu mapti lo se go'i lo ka ce'u se zenba .i fo'a ma'i lo jecta cuntu cu farvi fi pa le'i tsali nanmu fe le co'a se tcita be lu le ba'e pa tsali nanmu li'u bei cu'u ku .i djuno lo du'u pi ro le bi'u nai tcini cu se ckape da'i lo nu fo'a farlu pe'a da'i le jikca stuzi pe'a noi za'i di'a nakspe la ambylis .i fo'a ricfu .i je bo lo nanca dikni rupnu be li re ki'o poi pe'a ke'a ku'i na'e mintu do'a lo'e nu lo civla cu batci cu na'e dukse co selyle'i fo lo nu la krispinas bu'u nai le zdani cu xabju .i li'a fo'a pu mutce co zungi le bi'u nai se nupsi'u .i ba za bo fo'a ca lo nu gasnu lo nu mi selsivni cu cusku fi mi fe lo se du'u lo nu pleji le pinfu jdini noi smaji jdini fi'o tercme da'i mi kei fo'a te xlura fo lo po'o nai nu terpa lo nu ga nai na pleji da'i gi ju'o cu'i le zerle'a cu tolri'ugau pe'a lo ka ce'u fengu je steba kei ri'i le pinfu .i cu'u fo'a lo nu pensi lo nu ko'a selsi'a ke pleji vitke fi pa lai poi daplu lufutn cu xagmau lo da'i nu ko'a noi ke'a selxai cu badri nandu xabju lo zdani .i fo'a pleji co detyselylacri du'i lo nu zo'e na'o pleji lo jelca zdani binrydi'a .i du'i bo lo danfu notci cu klama fo'a se cu'u lo se du'u ge lo selyle'i pu ba'o se cpacu gi la krispinas cu kanro gi'e gleki milxe .i pa da xatra fo lo se du'u ko'a tolcando platu fi lo nu xagze'agau lo ve ganzu be lo xi'orce'u cuntu kei fe zo'e poi ko'a ba stidi ke'a lo masyja'a bende be vi ko'a .i pa drata cu go'i fo lo se du'u ko'a suksa binxo lo bilmnreumatizmi gi'e klama lo braplu te zu'e lo nu se mikce .i se ki'u bo lo ji'a rupnu be li bi no cu se mi'ecpe ce'o se pleji .i li'a lo nu le pinfu gau lei prezerle'a cu ru'i kanro cu prali ri .i je ku'i lo ka le se go'i cu mipri lo selpla cu ve jinvi lo du'u le bende cu se manci je'u .i le nakfamti cu pleji so'i da .i je bo ku'i lo ni lo nu fo'a badri cu carmi cu ka'e se jdikyri'a lo nu fo'a pensi lo du'u le terle'i cu steci certu li'u

ni'o lu ca'o ku xu le pulji co'u troci lo nu facki fi le selmipri ninmu sei le karnysku cu te preti li'u

.i lu na go'i .i le pulji cu ru'i nai vitke le nakfamti te zu'e lo nu jungau fi lo datni poi py jinvi lo du'u cumki fa lo nu ke'a tolmipri da pe se ra'a lo selzva ja selfri pe ko'a .i je ku'i ru'a le go'i cu smadi lo du'u ju'o cu'i le se djuno be fo'a cu zmadu lo te jungau be le go'i bei fo'a .i ba bo ba lo nu ko'a canci kei za lo nanca be li bi la krispinas cu dracysmi suksa se'ixru le zdani poi ko'a pu cizra cliva ke'a li'u

.i lu u'e xu ko'a pu rivbi le nu ru'i pinfu li'u

.i lu ko'a pu no roi se kavbu .i le nu ko'a cu kaskla lo nalzda cu se rinka le nu suksa cirko ro le selmo'i .i ko'a simsa lo'e lumni'u certu lo ka ce'u na'o selta'u .i se ri'a bo lo du'u ko'a smadi lo du'u ko'a me lo se go'i cu spaji naltce .i je bo lo du'u lo prenu cu krici lo du'u ko'a lumni'u kei gi'e sidju ko'a lo nu se jibri cu pajme'a .i ko'a pu ve'u kaskla la bEminm gi'e stodi milxe se jibri bu'u ri .i lo nu ko'a carmi gunka je selci'i lo nu ko'a nicygau lo kumfa po lo prenu cu fapro lo nu ko'a ckaji lo ka ce'u xarnu je jitro .i lo nunjenca be lo nu ko'a tolselsi'a selta'a se cmene lu le mi vrude ninmu li'u lo catnrkiuratu poi ko'a fapro ke'a lo selklo be le glagau minji bei le cecmrparoxiu ke zgiseltigni balku'a cu rinka lo nu suksa fa lo nu ko'a di'a morji zu'i .i lu io nai le'o za'a do ca tolmo'i lo du'u do ca'a tavla ma kau li'u fi ko'a xaitce pinka .i bo la'e di'u cu je'a dukse lo ka ce'u jursa kei va'o lo nu ba'e ko'a pu ba'e zi morji li'u

.i lu ua nai u'e ku'i sei le karnysku cu ki'asku le prenu pe la poi daplu lufutn zo'u pu kavbu ma li'u

.i lu lo xanri curve pinfu .i le cfari cu nuntoi da poi le tcini be le lanzu cu slabu ke'a zi'e poi ke'a gau ku co'u se jibri lo nu nakse'u la'a ku'o lo nu da ticygau fi la eduyd ambylis lo nu dunda lo jdini gunma pu lo nu le selmipri ninmu cu tolcanci .i le selyli'e ke nanca dikni selyle'i cu nalselpla seljmina fi le pa moi selyle'i

.i la krispinas cu facki lo du'u lo nu ko'a ze'a lo nanca be li bi cu de'a turni kei pu rinka lo nu ko'a bleze'a lo ka ce'u jitro le panzi noi ke'a ca makcu .i je ku'i le nakspe no roi snada lo banli be ma'i lo jecta munje ba le nu ko'a se'ixru .i bo lo nu troci lo nu mansa ciksi lo nalte'i selski nu pleji lo rupnu be li pa xa ki'o ca'o lo nanca be li bi cu banzu lo nu xaksu ro lo nejni co menli be fo'a

ni'o za'a ma'a nau zvati la bEograd e le za'u moi ke fange jecta cteki briju li'u

to'i ni'o ni'o ro le su'e re moi be le'i jufra be fi le glico bei se pa'u le cfika cu du zoi zoi

In a first-class carriage of a train speeding Balkanward across the flat, green Hungarian plain two Britons sat in friendly, fitful converse. They had first foregathered in the cold grey dawn at the frontier line, where the presiding eagle takes on an extra head and Teuton lands pass from Hohenzollern to Habsburg keepingâ€”and where a probing official beak requires to delve in polite and perhaps perfunctory, but always tiresome, manner into the baggage of sleep-hungry passengers.

zoi toi

cmevla, fu'ivla, and new lujvo

ambylis : cmevla : Umberleigh
balkan : cmevla : The Balkans
bEograd : cmevla : Belgrade
bEminm : cmevla : Birmingham
bilmnreumatizmi : stage-3 fu'ivla : rheumatism sufferer
catnrkiuratu : stage-3 fu'ivla : curate
cecmrparoxiu : stage-3 fu'ivla : parish
cipnrxakuila : stage-3 fu'ivla : eagle
cpimo'u : lujvo : beak : m1 is the mouth/oral cavity [body-part] of m2=c1 bird of species c2
eduyd : cmevla : Edward
gugdrmadiara : stage-3 fu'ivla : Hungary
jdasre : lujvo : heretic
krispinas : cmevla : Crispina
kulcitsi : lujvo : school term
lufutn : cmevla : Lofoten/Lofoden
luvr : cmevla : Louvre
monmartr : cmevla : Montmartre
nafxu'a : lujvo : contradict
nurma catnrdini : stage-3 fu'ivla : rural dean (Anglicanism)
paulos : cmevla : [St] Paul [of Tarsus]
pedjikca : lujvo : friendship
pedysmi : lujvo : friendly : p1=s1 is similar to a friend of p2=s2 in property s3
pikydilis : cmevla : Picadilly
surselstu : lujvo : resort : st2 is a resort at location st1 for visitors su1 for leisure activity su2
vin : cmevla : Vienna (from Ger. Wien)
vancanja : lujvo : wine merchant
xapspurk : cmevla : Habsburg
xoynytsolrn : cmevla : Hohenzollern