Robin's Palm Writings: nicte cadzu 2 pi 1 pi'e 2 mo'o

Robin's Palm Writings Category: la nicte cadzu

Navigation: la nicte cadzu Index Robin's Palm Writings Top-Level Index


ni'o la pal xance jarco le nu citka vau kumfa gi'e cusku lu vorme ti so'a kumfa li'u .i sy cusku lu ta'a pal ma krinu mu'o li'u ju'e lu so'a roi ku su'o so'o kalte cu zvati .i .io so'i cai roi citka .i se ni'i bo da poi zekri pagre le rinsa kumfa cu bilga lo nu bu'u damba pu lo nu nergau lo vajni kumfa li'u .i je'u sy zgana lo to'e plana ninmu poi citka lo tansi titnanba poi klani zmadu ro da poi sy pu viska .i lo nu citka cu cizra cinri sy .i ku'i py cmila gi'e cusku lu ko na jikca to'e vrude catlu .i lo kalte cu ro roi nitcu lo nu barda citka li'u

ni'o py ve'a cadzu gi'e cusku lu ta'o nai ti vorme lo makfa ritli kumfa li'u .i lasna le vrogai lo papri poi se prina lu ca ca'a ritli .i KO MaLGLETu NA'E NERGau li'u .i ji'a sy zgana re lo pixra be lo skina prenu poi cpana ro lamji ke bitmu pagbu be le vorme .i ji'a sy tirna lo smaji se cmoni poi se krasi le ritli kumfa .i sy te preti ro pu zi se skicu .i py cusku lu le papri cu jalge lo nu ti pu kalri binxo ca'o lo ritli .i la'e di'u rinka lo nu la .reitcel. ze'i menli se jitro pa la daspo fekcrida li'u ju'e lu ta'a pal fekcrida ki'a mu'o li'u ju'e lu .u'u .i so'o klesi be lo crida cu zasti .i lo crida poi mi'a damba cu se cmene zo fekcrida mi'a .i ki'u bo lo nu da viska lo cmima be pa lo so'o klesi be la fekcrida cu la'a rinka lo nu da fenki binxo .i ji'a ra'u nai la fekcrida cu mulno lo ka menli frica lo remna .i lo ni frica cu banzu lo ka di'i fenki simlu .i bi'u la daspo fekcrida cu troci lo nu daspo ro drata prenu .i ku'i la sepli fekcrida noi djica lo nu sepli ro drata prenu cu xebni la daspo fekcrida .i se ki'u bo ra sidju mi'a .i ta'o nai la .reitcel. cu se jitro binxo .i se ri'a bo lo tarbi be ry cu se daspo .i ji'a ry ca na ferti .i ta'o mi'a krici lo nu la bi'u nai fekcrida cu djuno lo du'u ri ba zi mrobi'o .i se ki'u bo ri troci lo nu daspo ro da poi ri kakne li'u

ni'o la pal badri bacru gi'e cusku lu mi'a na nelci co tavla fi la'e di'u .i ta'o nai pu la'e de'u ry fadni remna gi'e na djica lo nu binxo lo blupinxe .i ku'i la'e de'u cu mukti lo nu ry galfi lo se jdice .i ba zu ku ry ca ralju je jatna kalte .i ji'a ry galfi le papri noi pu na vasru lu malgletu li'u gi'e kajde fi lo nu catra da poi na jundi ri li'u ju'e lu .ii sai .y. .u'u blupinxe ki'a li'u .i py se viska ckaji lo ka spaji gi'e cusku lu pinxe lo ciblu .i li'a la deivid na ciksi .i ro kalte cu blupinxe .i la'e di'u cu mukti lo pixra be la .belas. .lugosis. poi do pu zgana .i la belas lugosis cu traji lo ka xamgu ke xanri blupinxe vau fo ro remna .i .u'i mi na troci lo nu terpa rinka .i la nicte cadzu cu rinka lo ranmi be lo blupinxe .i ku'i pi so'e ranmi cu na drani .i ra'u ba'e na ku lo kalte cu nitcu lo nu ciblu pinxe .i zo blupinxe cu xajmi .i ji'a lo solri na mrobi'o rinka .i .e'u mi jarco lo drata pagbu be le dinju gi'e ba bo ciksi li'u ju'e lu xamgu .i ta'o xu la fekcrida cu cmoni li'u ju'e lu go'i .i la stefen ca ritli makfa dapma lo ve xumjimcelxa'i lo nu xrani la fekcrida li'u ju'e lu .oi xumjimcelxa'i ki'a sai li'u ju'e lu lo xarci poi cecla lo jinme lo xukmi .i ro pulji cu bevri lo cmalu xumjimcelxa'i li'u ju'e lu .ua mi jimpe .i mi'o ca klama ma li'u ju'e lu le cukta kumfa li'u


Created by rlpowell. Last Modification: Tuesday 16 of January, 2007 21:42:22 GMT by rlpowell.