Robin's Palm Writings Category: la nicte cadzu
Navigation: la nicte cadzu Index Robin's Palm Writings Top-Level Index
ni'o sai mu mo'o gapru loldi
ni'o mu pi pa mo'o nu kajde
.i la .susan. cu cusku lu .i ba la'e di'u ti na se sazri li'u .i la .rut. .ann. cusku lu la'a le sutra vreji pagbu cu spofu li'u gi'e punji le vreji cukla le skami gi'e cusku lu .u'u le sutra vreji cipra semtci ba ze'u gunka .i .e'u mi'o vitke le citka kumfa li'u .i sy tugni .i se ki'u bo sy joi ry klama le citka kumfa
ni'o la .kim. pu nenri le citka kumfa .i sy joi ry zutse ne'a ky .i ry fa'u sy cpedu lo jisra be lo slari grute mu lo glare cirla snuji la .djen.
ni'o lei ci ninmu ze'a casnu .i la .kim. cusku lo se du'u le bruna be la .deivid. pu zi canci .i ry simsa lo ka milxe terpa pensi la'e di'u .i sy cusku lu xu vajni li'u .i ry cusku lu le bruna be dy cu ze'u jilra dy se ki'u lo blupinxe se vlipa be dy .i ku'i le bruna cu djuno no da poi srana lo blupinxe .i ku'i by pi viska lo se vlipa fi'o se snuti dy .i ba bo by di'i troci lo nu facki lo krasi be lo se vlipa be dy .i ji'a le bruna na xendo .i mi terpa lo nu da'i le bruna cu troci lo nu sfasa dy kei ta'i lo nu canci simlu li'u
ni'o ba za bo la .pal. nergau le kumfa fi'o kansa lo mutce cmalu je tolcitno ninmu .i la .kim. sanli gi'e cilte krosa'i gi'e cusku bau la .gliban. lo'u .io fi'i .uujin. mi'a mutce gleki lo nu le'u .i la .uujin. cu jai dicra la .kim. gi'e cusku lu le cukta cu te facki li'u .i ky se jvinu lo ka tera kei gi'e cusku lu bu'u ma li'u ju'e lu lo jibni .i le judri cu cpana le ti pelji li'u .i le tolcitno ninmu cu dunda le pelji gi'e sutra cliva
ni'o ky catlu le pelji gi'e ku'i sy krici lo du'u ky na tcidu .i ry ji'a to'e gleki simlu .i se mu'i bo sy cusku lu le cukta cu mo li'u .i la .deivid. to ri pu zi nergau le kumfa .i sy tirna .i ku'i ry milxe se spaji toi cusku lu le ralju cukta be fu lo ciblu joi lo bongu .i mi'o te cmene fi la'e di'u mu'i lo nu le cukta cu marji lo pelji be lo remna bongu joi lo xinmo be lo remna ciblu li'u ju'e lu .yyy. zbasu lo pelji be lo remna bongu ta'i ma li'u ju'e lu gasnu lo purmo gi'e pilno lo makfa li'a li'u ju'e lu je'e do cukta ma ma ma li'u .i la .kim. cusku lu lo makfa po lo fekcrida lo na se djuno lo fenki poi djica lo nu vlipa binxo li'u
ni'o sy ze'a smaji pensi gi'e ba cusku lu ma mukti lo nu do na daspo le cukta li'u .i ro jibni cu milxe cmila .i vy cusku lu mi'o so'e roi daspo ri .i ku'i ri ro roi xruti .i mi'o ji'a troci lo nu mipri se pinfu ri .i ku'i ri ro roi canci gi'e ba tolcanci bu'u lo jibni be lo vlipa djica remna .i li'a le makfa po le cukta cu dukse lo ka vlipa kei lo nu ny cy vitno daspo le cukta li'u
ni'o sy to'e gleki se sance gi'e cusku lu ti'u ma mi'o klama li'u .i la .deivid. cusku lu lo cabna li'u ju'e lu .i ku'i la .stefen. cu pa mei kalte ca le cabycte .i pe'i mi'o nitcu lo mafpre li'u .i vy joi ky simxu ke vajni catlu .i vy cusku nu'i? ge lu ko facki la .axmed. .e la .raitcel. li'u ky gi lu lo mafpre pi so'o roi dukse lo ka nelci le cukta .i le cukta cu vasru so'i se mipri be lo fekcrida .i ku'i le cukta cu dukse lo ka kajde .i pu bo so'o cmima be ny cy cu palci binxo ba lo nu tcidu le cukta .i se ki'u bo ta'o nai mi'o na djica lo nu le .stefen. cu kansa klama li'u sy
ni'o la .kim. ba zi xruti gi'e kansa la .axmed. .e lo citno ke makcu nanmu poi jgari le betfu be .a bu .i ky cusku lu ry ba zi tolcliva mu'i lo nu ca gasnu co dasni lo drata li'u .i sy cusku lu doi .axmed. ti mo li'u .i .a bu cusku lu se prami mi li'u gi'e prami jgari le nanmu .i sy cusku lu .oi ru'e ji'a ti se cmene ma li'u ju'e lu la .maikl. li'u .i sy cusku lu coi .maikl. .i mi gleki lo nu penmi do li'u .i mu cusku lu .yyy. ki'e do .yy. mi na jimpe mutce la .lojban. li'u
ni'o pu lo nu sy spuda kei la .raitcel. tolcliva le kumfa gi'e cusku lu xu ro kalte cu bredi li'u .i .a bu .e sy .e vy .e ky cusku lu go'i li'u .i ba zi bo le se go'i cu nenri le karce gi'e klama le judri be le cukta