History: Robin's Palm Writings: nicte cadzu 6 pi 1 pi'e 2 mo'o

Source of version: 2 (current)

Robin's Palm Writings Category: la nicte cadzu Navigation: ((Robin's Palm Writings: la nicte cadzu|la nicte cadzu Index)) ((Robin's Palm Writings|Robin's Palm Writings Top-Level Index)) ni'o vy cmalu cisma gi'e cusku lu mi na pu te preti le se djica .i xu do morji le nanmu li'u .i sy cusku lu so'i citno nanmu pu jibni le skina dinju li'u ju'e lu da poi do cindji catlu li'u ju'e lu .u'i mi pu cindji catlu so'i nanmu .e so'o ninmu .i na sidju li'u ju'e lu .u'i da poi ponse lo pelxu je blabi kerfa .e lo xekri palku li'u ju'e lu go'i li'u ju'e lu do ze'a cindji catlu le nanmu .i ma mukti lo nu do na cpedu lo nu senvi penmi li'u ni'o sy milxe jenca .i ba za bo cusku lu pa mai mi na djuno lo du'u do na fengu li'u ju'e lu mi jimpe .i do ba djuno li'u ju'e lu go'i .i re mai mi jikca terpa .i mi na certu lo nu cpedu lo simsa li'u ju'e lu .ue sai do barja selfu li'u ju'e lu .i se ki'u bo mi tcetce certu lo nu rivbi lo cindji nanmu .i na srana li'u ju'e lu je'e li'u ju'e lu ci mai mi terpa lo nu mi se snuti xrani ca lo nu gletu kei ri'a lo nu mi blupinxe tsali li'u ni'o la .deivid. .e la .kim. .e la .raitcel. cu cmila .i ry cusku lu pi so'a cnino blupinxe cu simsa terpa .i ku'i lo nu lo blupinxe cu pilno lo blupinxe ka tsali cu se sarcu lo nu sanji djica .i la'a lo traji purci blupinxe cu ja'a se snuti xrani .i le blupinxe te bilga cu so'u roi se galfi .i ku'i pa re'u se galfi fi da poi te bilga lo nu lo blupinxe cu kakne lo nu pilno lo zmadu remna ka tsali kei ri'a lo nu sanji djica po'o li'u .i sy cusku lu .ui sai ki'e .raitcel. li'u ni'o ry cusku lu doi sy mi na ru'e tolmorji .i lo blupinxe goi ko'a cu skami mrilu fi ro blupinxe se cu'u le se du'u le jmive po ko'a cu mutce ckire lo nu da benji de poi zekri lebna lo jukni .i je li'a do mintu mi'o .i ko'a cusku le se du'u le nanmu cu ze'u tcetcetce cortu gi'e ku'i na mrobi'o li'u .i sy cusku lu ki'e .raitcel. .i mi mutce gleki li'u ni'o gau ky pa papri cu carna .i se ki'u bo sy viska lo selcku poi srana lo barda lardai be ne'i la solji vorme panka .i le dacti cu ve pluta fo lo pluja ma'i lo mudri grana poi se sraku ve pixra lo cizra flira .i fi'o suksa bo sy krixa cusku lu ti bradi .i ti bradi .o'o nai cai li'u gi'e zgagau le pixra be le larcu finti .i ro vi prenu cu se suksa ke cmalu plipe .i ky jai gau carna gi'e catlu vau le papri .i ry .e dy sezmuvgau ri'a lo nu catlu djica .i ky cusku lu mi na se slabu le nanmu li'u .i sy cusku lu ti jatna le rokci katnygau poi finti lo rokci remsmimi'i .i ti rivbi lo nu se kavbu gi'a se catra li'u .i vy cusku lu .ua nai ti na se jvinu simsa le jatna .i mu'a ti se kerfa lo xekri simsa li'u .i sy cpacu le papri gi'e cusku lu .y. .ua nai sai na go'i .i ti se kerfa lo blabi pelxu pa'a le jatna ni'o le jmive poi se vitke le menli be sy cu cusku lo na'e bangu panra be lu la .susan. cu drani li'u .i ji'a sai le jmive cu cusku ro lo blupinxe ne'i le dinju .i ba zi sai bo la .stefen. sutra bajra nerkla le kumfa .i sy na pu viska lo nu da dukse cy lo ka sutra .i cy mo'u bajra se pi'o le jubme gi'e cusku lu sy gasnu ma li'u .i ry cusku lu sy xusra lo du'u ti pixra le jatna be le rolci katnygau noi pu za pilno le rokci remsmimi'i li'u .i cy sutra katna pa birka ke ciblu tubnu be cy gi'e punji lo ciblu le pixra gi'e mutce gunka catlu le pixra ni'o sy mutce se cfipu le se gasnu be cy gi'e ku'i na tavla .i ba za bo le ciblu muvdu se ri'a lo cnino ?to? xunre toi pixra .i li'a pixra le rokci katnygau jatna .i sy catlu le jibni .i la .raitcel. .e la .deivid. .e la .kim. curve lo ka jenca .i ji'a le pilka be ry zi zenba lo ka blabi .i ku'i cy li'a mutce gleki gi'e cusku lu li'a lo xamgu cevni cu zasti to'i cy catlu sy toi .i fi'i cai doi na'e se tcica ganse li'u .i cy catlu le drata jibni gi'e cusku lu mu'i ma do cinmo lo xlali .i ma'a siska lo na'e se tcica ganse ze'u lo nanca be li vo no no .i mi'o bilga lo nu mutce salci .i .oi le nu bajra cu rinka lo nu mi xagji to'i cladu ke krixa cusku toi .i pe'u sai .djen. ko dunda mi lo jisra be lo -avocado-?