History: The Berenstain Bears Get in a Fight

Source of version: 6 (current)

::-=lo la BERenstain. cribe co'a simda'a =-:: ::ni'o ca lonu re ribve'a cu na simpe'o kei le makcu cu xanka .i ma pu nabmi:: ::''ni'o la’edi’u se fanva la andrus. piekarskis. gi'e se cipcta la maikl.turnianskis.'':: ni'o ca so'e cerni bu'u la ribgu'e ge lo solri cu galmu'u tezu'e lonu rinsa pe'a lo djedi gi lo fuksnacpi cu sanga lo fukpi selsa'a ti'a lo galtu canko be le ricyzda be le cribe .i ne'i lo ricyzda la buncribe .e la mesycribe vu'o goi ko'a cikybi'o .i la buncribe .e la mesycribe so'eroi xamgu simpe'o .i ko'a cu porzu'e tu'a lo lumku'a .i ko'a cu cusku zo pe'u .e zo ki'e ca lonu cersai .i ko'a ta'e kansi'u lo nu zutse ne'i le ckule sorprekarce .ije ba tu'a lo ckule ko'a gleki kansi'u lo nu gunka lo steci no'u tu'a lo ricyzda be ko'a po'o co trixe selsrustu .i .ue ku'i ca pa grusi cerni la buncribe .e la mesycribe naku pendo ma'i da .i la'acu'i ga tu'a lo tcima gi lonu lo fuksnacpi cu za'o sipna cu krinu lonu go'o .i ku'i ki'u makau la buncribe .e la mesycribe co'a vajni simda'a ni'o la mesycribe cu kargau lo kanla gi'e tcena pe'a .ibabo mycy. cu zutse gi'e gasnu lonu lo tuple cu dandu be lo korbi be le ckana be'o ca'u ba'e lo flira be la buncribe .i lo nu go'i cu na'e se mukti lo nu tolclite djica .i lonu go'e cu cumki fasnu ri'a tu'a lo senta ckana .i ku'i ca le cerni la buncribe naku cu zabna cinmo .i lu .oi doi mesycribe li'u se ki'asku bycy. .i lu ko muvgau lo mabla tuple lo flira be mi li'u go'i .i lu .o'onairu'e lo tuple na mabla .ije ri na zvati ca'u lo flira be do li'u se ki'asku la mesycribe .i lu .o'onaisai ko muvgau lo mabla flira lo flira be mi li'u se capsidba'u la buncribe .i lu .o'onaicai ko smaji li'u se biksku la mesycribe .ije pu lonu la buncribe cu ka'e spuda ku mycy. pipkla lo lumku'a pu bycy. .i ze'uku mycy. ...brulu'i lo denci gi'e lumci vo'a gi'e burcu nicygau lo kurfa .i lu .ei .o'onai ko barkla le lumku'a li'u se ki'asku la buncribe fau lonu rapyda'i lo vrogai .i lu .i'enai doi buncribe li'u selsku la pafcribe fau lonu barkla fi lo pycy. ckaku'a .i lu do djuno lo du'u na selcru fa lonu ki'asku fi lo mensi be do li'u go'i .i lu .oi mycy. za'o nenri lo lumku'a li'u se patsku la buncribe .i lu go'i tezu'e lonu fanza li'u go'i .i ca lonu la buncribe cu lafti lo bolxa'e tezu'e lonu za'ure'u darxi lo vrogai kei kei ri karbi'o .ije la mesycribe cu barkla va'o lonu mlenicygau vo'a .i lu .io .iu coi doi patfu li'u pluka selsku mycy. .i lu .o'onaisai li'u se fegba'u la buncribe .i la buncribe .e la mesycribe cusku zo pe'u na.enai zo ki'e ca lo cerni ca tu'a lo cersai .i ki'u bo ko'a na casnu .i ji'a ko'a zutse nalkansa ne'i lo ckule sorprekarce .i la mesycribe fa'u la buncribe cu zutse sedi'o lo crane fa'u lo darno trixe .i ca le ca lecydo'i ko'a cu fendi lo trixe selsrustu ricyzda fo lo midju linji tezu'e lonu tcitygau zi'o ro xadba lo du'u makau ponse ri .i na'e se zanfri fa lonu zutse ne'i le ricyzda gi'enai tavla .i bazaku ko'a cu ca'o kusru ta'i lonu le'axru lo na'o ke fatri simxu .i la mesycribe cu le'axru lo vo'a larcu kliti noi la buncribe pu zbasu lo dinsauru ke'a gi'e gurgau marxa ly. pa barda spisa .i la buncribe lo vo'a selkei bevma'e .e lo vo'a selkei vinji cu le'axru gi'e punji vo'e le galrai kajna noi la mesycribe na'e ka'e cpacu vo'e ke'a .i ko'a zenba loka fengu kei ja'e lo nu tolmo'i lodu'u ko'a na'e casnu kei gi'e co'a zmadu lo purci noi lausku ku'o lo ka cladu .ibabo la pafcribe cu co'a sezytoltro gi'e co'a lausku fi ko'a fe se du'u ko'a bilga lo nu co'u lausku .i le jbixa'u na djuno lodu'u makau traji lo ka xlali kei fo le vilti'a ce le sance be le cribe zdani .i la mamcribe co'u kakne lo nu renvi .i ri setca re degji lo moklu gi'e laurtcetce siclu .i la pafcribe .e le ribve'a cu se spaji ja'e lonu sisti lonu lausku .i lu .ue doi mamcribe mi na djuno lodu'u do ka'e siclu tai ba'e ti li'u se cusku la mesycribe .i lu .o'onaisai ku'i mi je'u kakne la'e ri .iji'a mi cusku fi do li'u se cusku la mamcribe .i lo'u fe lo sedu'u mi co'u kakne lonu renvi lo vi nu bebna simda'a .i .iacu'i mi senpi lo du'u do morji lo du'u do damba fi makau le'u go'i .i le ribve'a cu troci lonu morji .iku'i na go'i .i la mamcribe cu punji le ribve'a lo tsetupyzbe .i lu .i roda su'ode zo'u da jo'u de so'oroi simda'a li'u se cusku my. .i lu .iji'a su'anai roda poi mutce simpa'i ku'o go'i li'u go'i .i .lu mi'o na simda'a li'u se cusku la pafcribe .i lu .ienai ja'a go'i li'u se cusku la mamcribe .i lu .ienaisai li'u se dausku la pafcribe .i lu mi'o ca simda'a seisa'a la mamcribe cu cusku lojei mi'o cu simda'a .i ca'o lonu la pafcribe cu pensi sera'a la'e di'u ku la mamcribe cu cusku ji'a lo du'u so'o nunsimda'a cu pagbu lo nunji'e .i lu .i roda fengu binxo gi'e su'anai simtercme lo mabla gi'e cusku lu'e lo smuni poi na krici ke'a .ije za fanmo li'u se cusku my. .i lu .i xu go'i pa'a le vilti'a li'u se cusku la mesycribe .i lo nuncarvi cu bazi mulno .ije le solri co'a dirce pa'o lo dilnu .i lu .i go'i li'u se cusku la mamcribe .i lu ko catlu li'u se cusku la pafcribe .i lonu le solri cu dirce pa'o lo fanmo carvi kei rinka tu'a lo tanbargu .i lu .i lo tanbargu du lo mutce melbi noi jai fasnu ba lo vilti'a li'u se cusku la mamcribe ca'o lonu catlu le ribve'a .i lu .i .a'u je'ecu'ido'u xu lonu simpapybi'o ba lonu simda'a kei cu simsa la'e di'u li'u se cusku le ribve'a .i lu .ieru'e li'u se cusku la mamcribe .ija'ebo la buncribe .e la mesycribe cu simpamjai gi'e co'a simpapybi'o .ije ko'a cu xamgu je snada simjikca pu lo nu za'ure'u simda'a ni'o ti fanmo __ni'o ko tirna le lisri__ __Listen to the story__ (download {file name="Berenstain_Bears_in_a_Fight.ogg" page=>Multimedia showdesc=1}).