History: le dunda tricu

View page Show All Versions

Source of version: 2

«
»

!::__le dunda tricu__::
!!::__sei la .cel. .silverstain. finti__::

::{img attId="897" heigth="652" width="486"}::

ni'o puzuku zasti fa lo tricu goi ko'a .:ijebo ko'a prami lo cmalu nanla goi ko'e .:ije ca ro djedi le nanla cu jbikla gi'e jajgau loi ko'a pezli gi'e zbasu fi ri fe lo jinmapku gi'e dracyka'i la noltrunau be le cicricfoi .:i ko'e gapcpare lo tsustani be ko'a gi'e muvyslidandu loi jimca be ko'a gi'e citka loi plise .:ije ko'a jo'u ko'e zdizu'e la vobmipri je zvafa'i .:ije ca lonu ko'e tatpi kei ko'e sipna bu'u lo ctino be ko'a .:ije le nanla cu prami le tricu .:i tcetce go'i .:ije le tricu cu gleki

ni'o bazuku le nanla pu tolci'oze'a .:ije lonu le tricu cu nonkanse cu cafne .:ijeku'i ca lo djedi le nanla cu klama le tricu .:ijebo le tricu cu cusku "lu ko mibykla doi nanla .:i ko gapcpare lo tsustani be mi gi'e muvyslidandu loi jimca be mi gi'e citka loi plise gi'e kelci bu'u lo ctino be mi gi'e gleki li'u"
.:i "lu mi dukse loka barda kei lonu cpare .e lonu kelci -sei le nanla cu cusku- .:i mi djica lonu terve'u so'o da gi'e zdifri .:i mi djica so'o jdini li'u"
.:i "lu .u'u -sei le tricu cu cusku- mi ponse no jdini .:i mi ponse loi pezli po'o jo'u loi plise po'o .:i ko lebna lei mi plise doi nanla gi'e vecnu ri bu'u lo tcadu .:ija'ebo do ba ponse lo jdini gi'e ba gleki li'u" .:iseva'obo le nanla cu gapcpare le tricu gi'e jajgau lei ko'e plise gi'e bevri ri lo darno .:ije le tricu cu gleki

ni'o ku'i le nanla puze'u darno .:ije le tricu cu badri .:ijeku'i ca lo djedi le nanla cu xrukla .:ijebo le tricu cu desku ri'a lo nungei gi'e cusku "lu ko mibykla doi nanla .:i ko gapcpare lo tsustani be mi gi'e muvyslidandu loi jimca be mi gi'e gleki li'u"
.:i "lu mi dukse loka tolcande kei lonu cpare lo'e tricu -sei le nanla cu cuksu- .:i mi djica lo zdani poi ba stodau mi loka glare -sei ko'e cusku- .:i mi djica lo speni .:ije mi djica loi panzi .:iseva'obo mi nitcu lo zdani .:i xu do kakne lonu dunda lo zdani mi li'u"
.:i "lu mi se zdani noda -sei le tricu cu cusku- .:i lo cicricfoi cu zdani mi .:ijeboku'i do jai se curmi fai lonu ka'arvi'u loi jimca be mi gi'e zbasu lo zdani .:ija'ebo do ba gleki li'u" .:iseva'obo le nanla cu ka'arvi'u lei jimca be ko'a gi'e bevri ri lo darno tezu'e lonu zbasu lo zdani .:ije le tricu cu gleki

ni'o ku'i le nanla puze'u darno .:ije ca lonu ko'e xrukla kei le tricu cu gleki seri'a lonu ja'aru'e kakne lonu bacru .:i "lu ko mibykla doi nanla -sei ko'a smasku- .:i ko vi kelci li'u"
.:i "lu mi dukse loka tolci'o je badri kei lonu kelci -sei le nanla cu cusku- .:i mi djica lo bloti poi ba bevri mi lo darno mutce .:i xu do kakne lonu dunda lo bloti mi li'u"
.:i "lu ko ka'arvi'u lo tsustani be mi gi'e zbasu lo bloti -sei le tricu cu cusku- .:ija'ebo do ba kakne lonu blokla lo darno gi'e gleki li'u" .:iseva'obo le nanla cu ka'arvi'u le tsustani be ko'a gi'e zbasu lo bloti gi'e blokla lo darno .:ije le tricu cu gleki .:iku'i na mutce go'i

ni'o bazu sai ku le nanla pu za'ure'u xrukla
.:i "lu .u'u doi nanla -sei le tricu cu cusku- mi ponse noda poi mi kakne lonu dunda ke'a do .:i lei mi plise na zvati li'u"
.:i "lu loi denci be mi cu dukse loka ruble kei lonu citka lo'e plise -sei le nanla cu cusku- li'u"
.:i "lu lei jimca be mi na zvati -sei le tricu cu cusku- .:i do na kakne lonu muvyslidandu ri li'u"
.:i "lu mi dukse loka tolci'o kei lonu muvyslidandu lo'e jimca -sei le nanla cu cusku- li'u"
.:i "lu lo tsustani be mi na zvati -sei le tricu cu cusku- .:i do na kakne lonu cpare li'u"
.:i "lu mi dukse loka tatpi kei lonu cpare -sei le nanla cu cusku- li'u"
.:i "lu .u'u -sei le tricu cu clavaxsku- .:i mi sotpa'a lonu mi kakne lonu dunda da do .:ijeboku'i mi te vimcu fo noda .:i mi cu po'o tolci'o ricyvelvi'u .:i .u'u sa'a li'o li'u"
.:i "lu mi na nitcu so'i da caku -sei le nanla cu cusku- .:i mi ja'a go'i lo po'o smaji stuzi tezu'e lonu zutse gi'e surla .:i mi tatpi mutce li'u"
.:i "lu .ua -sei le tricu ca gi troci lonu rajbi'o gi cusku- ja'o lo tolci'o ricyvelvi'u cu plixau fi lonu zutse gi'e surla .:i ko mibykla doi nanla .:i ko zutse .:i ko zutse gi'e surla li'u" .:ije le tolci'o nanla cu tinbe .:ije le tricu cu gleki

History

Enable pagination rows per page

Information	Version
Mon 02 of Jul, 2012 09:38 GMT vensa from 194.90.105.94	4		Actions View Source
Tue 26 of Jun, 2012 09:48 GMT vensa from 194.90.105.94	3		Actions View Source
Mon 18 of Jun, 2012 15:25 GMT vensa from 194.90.105.94	*1 - 2*		Actions View Source

Search Lojban Resources