le gusta co minde mutce
fi'e la'o py. 宮沢賢治 .py. ( la'o gy. Miyazawa Kenji .gy. ) ca li 1924
fanva fa la .tijlan. zoi py. 注文の多い料理店 .py. ( la'o gy. The Restaurant of Many Orders .gy. )
si'u la .xorxes.
ca'oku lo cmana condi co sa'ei .kasakasas. tricypezli cu se cadzu re citno nanmu sekai lo ka brito sonci simlu kei fau lo za'i jancybevri lo sa'ei .pikapikak. ceclyxarci gi'e se kansa re blabycribe pe'a gerku gi'e cusku tu'e lu
su'a le'i vi cmana cu xlali .oi .i no sai zo'e ga'i vi cipni ja vlilydanlu vau .oi .i .au.o'inai fe zo'e .e'inai sa'ei .tantaan. gunta
li'u .i lu
da'i lo nu friti so'o lo danti fi lo mirli ke pelxu betfymlana zo'u .ei mutce pluka ba'a .i da'i ri sa'ei .kurkur. carna gi'ebabo paunai loldyfarlu tai ma .a'u.u'i
li'u tu'u .i ke'u la'e de'u fasnu vi lo cmana condi .i condi fau lo nu puku se ke terpa je rivbycliva lo gidva poi ceclyxarci certu .i je mu'i lo za'i le cmana cu tai dukse vlipa kei ro le bi'unai blabycribe pe'a gerku cu kanlyxalni gi'e ze'a krixa gi'e vamtu loi fonmo gi'ebabo morsi binxo .i lu
je'u mi ba'o ka rupnu be li revonono kei cirko
li'u se cusku pa le nanmu goi ko'a fau lo zu'o laftygau lo le gerku ku kanlygacri .i lu
mi zo'u ka rupnu be li rebinono
li'u se cusku le drata goi ko'e fau lo za'i stedu vreta gi'e xenrysteba simlu .i ko'a co'a se flirytcima lo xlali ru'e gi'e catlu ko'e secu'u lu
mi .aipe'i xrutykla
li'u .i lu
.o'e mi ji'a zo'u co'a ganse lo ka ge lenku gi xagji .i xrutykla .aipe'i
li'u .i lu
ki'uku nau .uo sisti .ai .i .u'ucu'i ba'a klama fau lo nu le prulamdei xotli .i'a cu vecnu lo ma'arjipci fi lo rupnu be li pano
li'u .i lu
puku go'i fe loi ractu ji'a .i ja'o va'o caba na fu'i frica .i ki'u gasnu .aipeinai
li'u .i ku'i bu'odai lo nabmi zo'u lo du'u ma kau drani pluta cu co'u se jijnu .i co'a sa'ei .douf. brife gi'e sa'ei .za,uaza,uaz. tricypezli gi'e sa'ei .gotongoton. mudri .i lu
.ro'o betfu kunti .i ju'a lo mlana ze'a se cortu .oiro'o
li'u .i lu
go'e ra'o .i si'o cadzu .aubu'onairu'e
li'u .i lu
cadzu .aunai .i .oiro'e .i .auro'o citka
li'u .i lu
citka .au.ie
li'u .i la'e de'u cu'u le re mei cu se vanbi loi sa'ei .za,uaza,uaz. srasygunma .i caku lo mu'e fa'ati'a catlu zo'u zvati fa pa kamnobli ropno zdani .i fi'o se dandu lo pevmoklu cu tcita secu'u zoi zoi
RESTAURANT
WILDCAT HOUSE
zoi .i lu
doido'u .i .a'inaisai .i ti to'eki'unai lo za'i tai vanbi ce'u kei ca'a kagni stuzi zo'e .i .aipeinai mi'o nenrykla
li'u .i lu
.uanai tai zvati ti vau .a'e .i ku'i ba'ado'a vi ka'e nu citka zo'e
li'u .i lu
ju'osai go'i .i ki'u secu'u tcita .ianainai
li'u .i lu
nerkla .aipeinaibu'o .i mi ja'eda'i lo mu'e tolcikna binxo cu nu citka kei djica
li'u .i le re mei cu sanli vica'u le bi'unai moklu poi se greku lo blabi stakybliku zi'e noi ki'u nobli ckaji je'u .i ri se vorme lo blaci poi ve cusku lu
doi ro do ga'i do'u .e'o ko nenri .i na fanta tu'a ko
li'u .i le re mei cu mu'i mutce gleki secu'u lu
.u'e .i ba'acu'i lo munje cu ba'o jai va'u selzbasu ku'inai .i ze'u lo cabdei pu raktu gi'ebabo tai xamgu tcini .i za'a le ti zdani cu ka'e gusta co nonjdima selfu mi'o
li'u .i lu
za'a go'i ju'o .i lu na fanta tu'a ko li'u .ei se smuni di'u
li'u .i le re mei le vorme cu mo'ine'i catke .i ze'obo fe'eco'a bitmypluta .i ti'a le se go'e co blaci cu cusku lu
.i je sa'e mutcyselfu lo plana ja citno ku fi'isai
li'u .i semu'ibo le re mei cu za'ure'u mutce gleki .i lu
doido'u .e'e mi'o ca ca'a mupli le ka mutcyselfu ce'u
li'u .i lu
mi'o mupli ba'e ro le se go'i vau mu'anai
li'u .i lo mu'e bancyklama fo le bitmypluta zo'u zvati fa lo tsanyblanycinta vorme .i lu
ge'e cizra zdani .i ki'u ma fe'eso'iroi vorme vau .uanai
li'u .i lu
ti jai ruskytadji .i va'o lo lenku .a lo cmana ku ro zo'e tai se zbasu
li'u .i pu'o lo mu'e kalrygau le vorme cu facki lo za'i ga'u ve cusku lu
.i mi'a gusta co minde mutce .i la'e di'u ki'u se sanji ko ga'inai .e'o
li'u .i lu
pe'i ti nakunaku misno selvitke .i to'eki'unaibo tai cmana condi stuzi
li'u .i lu
go'e .oicu'iro'e .i ba'anaidai.e'o piso'usai lo misno gusta pe la .tokion. cu se stuzi lo barda dargu
li'u .i secu'uku le re mei cu kalrygau le vorme .i babo te cusku fo le ri trixe fe lu
.i dai ba minde mutce .i .e'o ko ga'inai roroi renvi
li'u .i lu
.oi ti sa'e se smuni ma
li'u .i ko'a co'i frumu .i lu
pe'i go'i lo du'u lo minde cu ni'igi mutce gi fanta .oi.u'udaidai lo nu sabji cu sutra
li'u .i lu
go'i ro'e .i .au.o'inai nenri lo kumfa
li'u .i lu
.i je .au nu jubme
li'u .i bu'ocu'idai steba lo nu za'ure'u vorme .i ne'aku dandu fa lo minra .i ni'aku zvati fa lo clani grana joi burcu .i fo le vorme cu xunre lerfu cusku lu
.i doi .io vitke do'u .e'o ko ga'inai vi gasnu lo nu ge lei kerfa cu cnici gi lei cutci cu jinsa lo dertu
li'u .i lu
ba'acu'iro'e .u'enai to'e cizra .i ba'anai vi le moklu mi do'a pu na'e sinma ki'u le nu tai cmana vanbi
li'u .i lu
tadji tinsa gusta .i pe'i cafne se vitke loi sekai nobli prenu
li'u .i mu'iku le re mei cu gasnu tu'a lei kerfa .e lei cutci .i babo mo paunai .i bazi lo mu'e fi le tanbo cu punji le burcu kei ge ri sa'ei .vouf. ka bumru canci gi sa'ei .douf. brife mo'ine'i le kumfa .i le re mei cu mu'igi se jenca gi jmaji simxu gi'e vlile kalrygau le vorme seka'a le lamji kumfa .i lo du'u ganai da'i na sutra kanro bo zenba va'u loi glare selcidja gi ba tceraktu fasnu kei se smadi le re mei .i ne'iku za'ure'u vorme secu'u lu
.i .e'o ko le ceclyxarci ku joi lei danti ti punji
li'u .i lo mu'e catlu zo'u vine'a xekri tanxe .i lu
.oinairo'e .i no zo'e flalu lo nu citka fi'o se jgari lo ceclyxarci
li'u .i lu
ki'anai loi .ia sekai tcenobli cu cafne vitke
li'u .i le re mei lo ceclyxarci .e lo skapydasri cu toltagjygau gi'e punji fi le tanxe .i za'ure'u vorme poi xekri secu'u lu
.i .e'o ko toldasnygau le mapku .e le kosta .e le cutci
li'u .i lu
pe'ipei .i mi'o go'e xu
li'u .i lu
vi'onainai.i'a go'e .i .iasai.ei loi tcenobli va zvati
li'u .i le re mei cu genxu dandygau le mapku .e le kosta gi'e toldasnygau le cutci gi'e pa'o le vorme ku sa'ei .petapetat. mo'ine'i cadzu .i ti'a ri cusku lu
.i .e'o ko vi punji le cnebydasrypijne .e le xancykarli batke .e le kanlyblaci .e le jdinydakli .e ro lo drata jinme to sa'e lo jipnykinli
li'u .i vine'aku lo xekrycinta je nobli snurytanxe ba'acu'i tai moklu kalri se stuzi .i kansa fa lo ckiku ji'a .i lu
.oinairo'e .i simlu lo ka va pilno lo dikca lo nu jukpa .i tu'e lo kamjinme dacti cu va'o ckape .i ra'ucu'i lo ba'e sa'e jipnykinli cu ckape tu'u .i di'u smuni .ia
li'u .i lu
go'i .ia .i ni'iku .uaru'e pleji vi ti xu ca lo nu cliva
li'u .i lu
go'i la'a
li'u .i lu
go'i ju'o
li'u .i le re mei ro le kanlyblaci .e le batke .e le drata cu toldasni gi'e gasnu lo nu se vasru lo snurytanxe .i sa'ei .patcin. stelygau ri .i vaku za'ure'u me lo vorme poi ca'u ke'a pamei ke blaci patxu .i fo le vorme cu cusku lu
.i .e'o ko gasnu lo nu le do flira je xance je jamfu cu ve'e se gacri lei kruji pe le patxu
li'u .i lo mu'e catlu zo'u je'u lo nenri be le patxu cu kruji co ladru .i lu
se gacri loi kruji vau ki'a
li'u .i lu
ti zo'u tu'e lo bartu cu mutce lenku za'adai.e'o .i da'i ri'a lo za'i lo kumfa nenri cu dukse glare kei fasnu fa loi skapyfenra .i tu'a ri se fanta ti tu'u .i bu'ocu'i va se zvati loi tcebanli .ia prenu .i .a'o.i'i mi'o tu'i lo ku'i tai vanbi cu co'a jikca lo noblylanzu
li'u .i le re mei cu gasnu lo nu lei patxu kruji cu gacri le flira .e le xance .e to toldasnygau lo smoka toi le jamfu .i mu'i lo za'i za'o se vasru le patxu kei ro le re prenu tai lo zu'o gacrygau fi le flira fe lei kruji cu mipri citka ri .i babo zi to'e cando kalrygau le vorme .i ti'a ri cusku lu
.i xu do ba'o banzu gacri gasnu .i le kerlo ji'a xu cu se go'i
li'u .i vi ti cmalu patxu pe loi kruji .i lu
je'usai fa mi ba'o na go'i .i .ii mi zo'u pupu'o ri'a kerlo skapyfenra .i ju'o le ti gustyjatna cu kurji sanji
li'u .i lu
.ie .i satci sanji .e'edai .i zu'unai mi nu co'a citka sutra .auku'i .i na'e sidju fa lo nu tai ru'i bitmypluta
li'u .i vica'uku lamji vorme secu'u lu
.i bazi jukpa mulno .i ju'o ditcu lo mentu be li me'i pamu .i nu zi citka cumki .i .e'o ko sutra gasnu le mu'e le do stedu cu se carvi le pancydjacu pe le botpi
li'u .i ca'u le vorme cu solji carmi botpi .i fe loi ri pancydjacu fa le re mei fa'a le stedu cu sa'ei .patcapatcatc. carvygau .i ku'i je'u le go'i ge'edai cu se panci lo sarvanju .i lu
ti ka sarvanju .uanai pancydjacu .i ni'ibo mo
li'u .i lu
la'a srera .i da'i .ia lo gunkypre fau lo za'i bilma cu pu fliba lo nu canja
li'u .i le re mei seka'a lo bancu cu kalrygau le vorme .i ti'a ri barda lerfu cusku lu
.i dai le pu'u lo minde cu ranji cu fanza .iepeiru'e .i .uudai.uo ri'e .i .uo la'edi'e po'o lamji .i .e'o ko ve'e danrysatre le xadni lei silna be ne'i le patxu
li'u .i za'adai vi blanu staku nobli patxu pe loi silna .i ku'i ba'e caroi le re mei cu terpa gi'e mu'e simxu catlu le flira noi ba'o mutce co se gacri loi kruji .i lu
ge'e cizra ju'a
li'u .i lu
go'i du'o mi ji'a
li'u .i lu
lu minde mutce li'u zo'u minde fa ra fe mi'o vau .ua
li'u .i lo'u
zo gusta zo'u du'o mi ni'i gusta nu'i genai fe lo cidja fi lo vitke gi fe lo vitke fi le gusta nu'u ju'a .i ni'iku la'edi'u se smuni .y. jy. jy. jy. ja'o lo du'u my. my. mi'o ...
le'u .i co'a sa'ei .gatagatagatagatat. desku seri'a lo za'i bacru nandu .i lo'u
.y. my. mi'o ... .iicai
le'u .i sa'ei .gatagatagatagatat. desku gi'e za'i bacru nandu .i lo'u
.eicliv...
le'u .i sa'ei .gatagatat. ko'a tu'a le ti'a vorme cu catke troci .i .uedaiku'i ri to'esai muvdu .i va za'ure'u me lo vorme poi ke'a fe'ereroi se ckikykevna co barda zi'e poi ve'i jarco lo kamrijno tarmi be lo forca je dakfu ku'o secu'u lu
.i bu'o .a'i.o'unaiba'anaidai .i mutce mansa .uosai .i fi'isai do'u ko ga'inai mo'i nenri
li'u .i ji'asai mo'ito'o le ckikykevna ku re blanu kanlybolci sa'ei .kiorokioror. fa'a ti cu catlu .i lu
.iisai
li'u sa'ei .gatagatagatagatat. .i lu
.iisai
li'u sa'ei .gatagatagatagatat. .i le re mei co'a klaku .i babo ze'o le vorme cu sa'ei .kosokosos. ka mipri bacru secu'u tu'e lu
.a'onai.i'i .i za'a.i'i ba'o se facki .i .i'i na .aidai.oi gasnu tu'a lei silna
li'u .i lu
.uenaisai .i ju'a le la jatna ku cusku tadji cu xlali .i le nu ba'e bu'uku te notci lu dai le pu'u lo minde cu ranji cu fanza .iepeiru'e .i .uudai.uo ri'e li'u .ionai zo'u bebna .e'edai
li'u .i lu
.a'ucu'isai.i'i .i ka'u ba'a.uinai mi'o na se fatri lo do'a bongu do'anaidaisai.oi
li'u .i lu
go'i .ie .i ku'i lo nu da'i ti na'e mo'u se nerkla ra zo'u mi'o fuzme ju'opeinai
li'u .i lu
klamycpedu .aipei .i .ai .i coi doi .io vitke .i ko sutra lo nu klama .e'o .i klama klama .e'o .i loi palta dai cu ba'o jinsa .i je loi .a'a kobli dai cu ba'o silna mixre .i lo lamji zo'u po'o gasnu lo nu do .io joi lei kobli cu kansa simxu gi'e cpana lo ba'e blabi palta .i .e'o sutra klama
li'u .i lu
coi klama klama .e'o .i xuku'i .io na'e nelci lo nu salta .i ganai go'i gi .e'u co'a gasnu lo nu fagri gi'e jelca .u'adai kei vau .iepei .i sa'u sutra klama .e'o
li'u tu'u .i le re mei zo'u ri'a lo nu menli se xrani kei lo flira cu ba'o simsa lo sa'ei .kcakcac. peljyfesti .i fau lo mu'e simxu catlu lo go'i cu sa'ei .vurvur. desku gi'e voksa claxu klaku .i ze'oku sa'ei .fufuf. cmila gi'e cladu cusku lu
klama klama .e'o .i ganai do tai klaku gi loi .u'aba'anai kruji cu ba flecycliva pe'ipeinai .i .i to vi'o zi lebna bevri toi .i .i fi'iju'isai sutra klama .e'o
li'u .i lu
sutra klama .e'o .i la jatna .io za'o za'i cutnybukpu dasni jeke dakfu jgari jeke tance mosra kei denpa tu'a do doi .io vitke
li'u .i le re mei cu klakyklaku klakyklaku klaku .i cabo to'oti'a bacru lu
sa'ei .uan.uan.guan.
li'u .i jai daspo be le vorme be'o plipe nerkla le kumfa fa re le bi'unai blabycribe pe'a gerku .i le pe le ckikykevna ge'u kanlybolci cu zisai to'o cliva .i le gerku ge ze'a ke cmoni clupyklama ne'i le kumfa gibabo fau lo mu'e za'ure'u pavykrixa cu sutra plipe fa'a le lamji vorme .i ri sa'ei .gatar. kalri binxo ja'e lo nu ro le gerku cu se sakci pe'a klama pa'o .i ne'i lo pe ze'o le vorme ku manku cu bacru lu
sa'ei .niaaon.xuaan.gorgor.
li'u .i babo lu
sa'ei .gasagasas.
li'u .i le kumfa sekai lo ka danmo cu co'i canci .i le re mei va'o loi srasu ku ri'a lo nu lenku cu sa'ei .vurvur. desku gi'e sanli stali .i lo mu'e catlu zo'u le taxfu .e le cutci .e le cnebydasrypinje cu go dandu lo va ricyjimca ginai cunsycpana lo vi ricygenja .i sa'ei .douf. brife .i sa'ei .kasakasas. tricypezli .i sa'ei .gotongoton. mudri .i sa'ei .fuun. le gerku cu cmoni xrutykla .i je ra'i lo trixe zo'e krixycusku lu
doi jatna .i doi jatna
li'u .i le re mei cu ri'a di'a menlykanro gi'e krixycusku lu
doido'u ju'i .i doido'u ju'i .i vi ti ju'i .i ko sutra klama
li'u .i klama fau lo zu'o sa'ei .za,uaza,uaz. catke loi srasu kei fa le bi'unai noi dasni lo maxrymapku ku'o kaltycertu .i cabo le re mei cu di'asai snura cinmo .i citka loi poi le kaltycertu cu bevri ke'a ku'o rismybolci .i xrukla la .tokion. fau lo mu'e ca'o te vecnu so'usai ma'arjipci kei .i ku'i le poi pu paroi binxo lo simsa be lo peljyfesti ku'o flira po'o baji'a lo mu'e go'i kei caji'a lo mu'e glarydjacu jinru kei ze'e na se xruti fi lo purci
fa'o