bimo'o prosa le zabna se snada be la donkixotes bei le bifymlo se lifri noi se terpa gi'e pu noroi xanri da ije go'i le termojyxau fasnu noi drata
no'i la donkixotes e la santcopansas cu zatfa'i cinoji'ivono bifymlo le va srasu foldi i dy ca lo nu co'a viska by cu cusku fi le dy xacysantyse'u fe lu be'ucu'i lo nu lo dimri'a ca'o gidva lo mi'o cuntu cu zabna zmadu lo mi'o pu'i se pacna i do viska doi pendo po'u la santcos le va su'ocino cilce brabracrida noi te facki zi'e noi ai mi ke'a damba gi'e caurgau lo ka jmive
zi'e noi lo te vimcu be ke'a ba krasi lo mi'o se ricfu i le nau nu jamna cu vrude i xamgu selfu le cevni lo nu vimcu le palci tsiju le terdi sefta li'u
i sy cusku lu ma brabracrida li'u
i le sy selse'u sy spuda lu tu noi do viska zi'e noi clani se birka i ta'eku lo su'o tu birka cu minli li ji'i re li'u
i sy spuda dy lu ju'i doi nobli le va simsa cu brabracrida nagi'e bifymlo i le simsa be lo birka cu balre lo molki gi'e cargau lo molki rokci ca lo nu ca'o se catke lo brife li'u
i dy spuda sy lu za'a li'a do na certu lo tai ve capli'u i tu brabracrida ju'o i ganai do terpa gi ko muvdu fi ta i ko jdasku ca lo nu mi tu damba co cilce je na'e prolanxe li'u
i dy ca lo nu ca'o cusku di'u cu jafti'e minde le xirma po'u la rosinantes i na jundi lo sy krixa kajde be fi lo nu lo pu'o se gunta cu bifymlo gi'enai brabracrida i dy birti lo du'u brabracrida iseja'ebo na tirna lo sy voksa gi'e na sanji lo nu by ca'a mokau kei ri'anai lo nu vi zvati i ca'o cladu cusku lu le'o ko na rivbi fi'inai tolvri je palci danlu i pa po'o nobli do gunta li'u
ibabo co'a brife i le barda balre co'a carna i dy ca lo nu viska la'e di'u cu cusku lu e'unai mi do ba sfasa ki'unai lo nu do zmadu le brabracrida po'u la briareos lo ka do muvgau xokau birka li'u
i dy ca lo nu ba'o cusku di'u cu sezpevdu'a le dy fetno'i po'u la dulsineas gi'e pikci ri lo nu sidju sera'a lo ca ckape i le xacysanta ca'o marbi dy ije le claxa'i cu bredi i dy co'a klama gi'e gunta le ca'u pamoi be le molki i dy darxi le molki le xarci le balre noi tsali se muvgau lo brife ja'e lo nu le xarci cu porpi gi'e falgau le xirma e le xirselma'erno'i noi carna re'o le foldi i sy sidju klama dy serai lo ka sutra pe lo nu le xasli cu bajra i sy ca lo nu ba'o klama cu facki lo du'u dy na ka'e muvdu
i la santcos cu cusku lu e'o le cevni mi'o bandu i ju'o mi fi le mi nobli pu cusku fe lo sedu'u ei ri traji pensi lo nu zukte i go'i lo sedu'u tu ca'a bifymlo noi ka'e na'e se djuno zo'e po'o noi le stedu be ke'a cu vasru by li'u
i la donkixotes sy spuda lu ko smaji doi pendo po'u la santcos i ka'u lo jamna cuntu cu zmadu ro drata lo ka ca'o cenba i uecu'i le prije po'u la frestón noi zerle'a o'onai le mi kumfa e le cukta cu galfi le brabracrida lo molki tezu'e lo nu mi claxu lo nu jinga i fy mi tai bradi i ba'aju'opa'e lo tolselylacri je palci ba na'e snada lo nu fapro le mi dakyxa'i vrude li'u
i la santcopansas cu spuda fi lu ba fasnu du'o le cevni li'u
i sy sidju dy lo nu co'a sanli gi'e xirma cpare la rosinantes noi milxe spofu i li'oli'o
di'u xe fanva fu la xorxes