lo nanla joi lo cipnrfalko

ni'o lo nanla ca lo nu jy cu jai nanca li xa kei lo patfu cu dunda lo cipnrfalko ny gi'e minde jy lo ka gau ce'u fy cu tolcilce .i ta'o fu'e sei py cu jungau be ny lo'e cipnrfalko cu catra zi'o gi'e tsani turni fu'o .i fy boi jy cu nalnei gi'e ji'a se nalnei .i ge mu'i gi fy se ja'urxe'a gi jy cu xanka gi lo se gusni bo simlu je kanla be fy. simlu lo ka ro roi zgana fy .i ri'a gi fy cu katna gunta jy va'o lo nu jy boi fy cu jibni gi ze'u lo jeftu be li su'o lo xance be jy cu blucri .i du'o nai jy boi py ba'o cuxna lo xabju be lo cilce bei ze'u lo zmadu be lo nanca be'o cipnrfalko noi ja'a ru'e ku po'o tolcilce binxo kakne .i ku'i lo bi'u nai nanla cu troci mu'i lo nu se minde lo ri patfu kei .e lo nu se jgira be py cu djica .i pamai jy ge ze'u stali fy gi ge jai gau ranji lo barda fai lo fy. nuncikna gi ji'a zgicu'u fi fy .i mu'i bo ti'e lo'e tatpi cipni cu za'e tolcilcybi'ogaufilzma .i re mai jy cu cilre fi lo cipni tutci .i .e'i jy cu jai gau visnalka'e fai fy gi'e mu'i gi lo nu no'a nardji gi na no'a gi'e fi'o zilzu'e fe'u gi zutse bu'u lo se viska be fy ku po'o gi .a'o fy cu lacri jy

ni'o mu'i gi jy pu ctigau fi'o xance ku gi fy na citka .i ba za ku jy cu citka carmi se ri'a lo nu katna lo jy. skapi .i ku'i lo nanla no'u jy cu gleki lo cabna mu'i lo nu zabna farvi .e lo nu djica lo nu lo cipni cu se selsau vo'a se ja'e ji'a lo nu .e'i fy cu citka lo ciblu be jy .i je facki lo ka melbi kei joi ka lo noi cinla vau nalci be ce'u cu prije joi tsali kei fy .i bo sa'e ca lo nu fy cu sfubu kei lo gusni fy cu muvdu simsa .i ji'a fu'e mu'a ca lo co'i nu fy cu cukla bo vofli je klama lo jy. xancidni kei jy ja'a ru'e gleki krixa .i su'o roi ku fy cu plipe lo jy. janco gi'e muvgau lo moklu lo jy. kerfa fu'o

ni'o ge jy je'a facki lo kampa'i fy gi ca gi jy cu birti lo du'u tolcilce na je je'a tolcilce gi jy cu klama lo patfu gi'e zgagau py lo jy. terzu'e noi ba'a py cu jgira .i ku'i sai jgira na gi'e ge jgari fy noi tolcilce je lacri zi'o vau lo xance gi cnebo be fy cu popygau .i «lu .i mi sei py cu cusku pu minde do lo ka tibgau lo cipni li'u» zo'u py cu toljgari fy noi loldi farlu .i «lu .i ku'i do jai te basti fi lo ka pamgau .i lo'e cipnrfalko cu na'e ke prami ke danlu pendo gi'e tsali joi kusru .i sa'e lo vi cipni zo'u se tolcilce na je spofu li'u» .i ba ku ca sa'e lo nu py cu cliva jy kei lo nanla cu klaku fi tu'a lo dalpe'o co'u lo nu py cu minde lo selfu lo ka derse'a fy .i ja'o jy no roi ze'e ba klaku gi'e ze'e ba morji lo poi ka spogau kei joi ka se spogau ku'o se facki be jy bei lo kampa'i